O EMEVE DESPRÁZASE A SEVILLA CON BOAS ESPECTATIVAS PARA A VITORIA
O próximo domingo, día 26, ás 12 horas disputarase no Pavillón deLos Montecillos, na cidade de Dúas Irmás (Sevilla) o encontro correspondente á terceira xornada da Superliga Masculina de Voleibol (SVM), no que o EMEVE de Lugo se enfronta ao Fundación Cajasol Juvasa.
Os lucenses enfrontaranse a un equipo que para a presente tempada se renovou completamente, con xogadores moi novos, que basea, principalmente o seu xogo, no «oposto» e nos dous «receptores». Ademais, os sevillanos contan o seu favor coas instalacións nas que se disputará este encontro, moi diferentes ás que habitualmente utiliza o Emevé. En Sevilla encontraranse cun pavillón moi estreito e co teito moi baixo, pero os de Lugo deberán adaptarse ás circunstancias e intentar gañar este partido.
O adestrador lucense, Diego Taboada, ve con optimismo este encontro, sinala que «esta xornada nos enfrontaremos a un rival directo, que ao igual que nós está completamente renovado e ao que esperamos gañar se facemos o noso xogo».